🔴 બ્રેકિંગ ન્યૂઝ | અમરેલી

લીલીયા રોડ પર નિર્માણાધીન અંડરબ્રીજના ખાડામાં બાઈક ખાબક્યું, એક પુરુષનું મોત, બે મહિલાઓ ઇજાગ્રસ્ત

અમરેલી શહેરના લીલીયા રોડ પર નિર્માણાધીન અંડરબ્રીજ પાસે મોડીરાત્રે ગંભીર અકસ્માત સર્જાયો હતો. ત્રીપલ સવારી સાથે જઈ રહેલી બાઈક અંડરબ્રીજના ખુલ્લા ખાડામાં ખાબકી જતા એક પુરુષનું સારવાર દરમિયાન મોત નીપજ્યું છે, જ્યારે બે મહિલાઓ ગંભીર રીતે ઇજાગ્રસ્ત થઈ છે.

પ્રાપ્ત માહિતી મુજબ, મોડીરાત્રે બાઈક પર એક પુરુષ અને બે મહિલાઓ મુસાફરી કરી રહ્યા હતા. અંડરબ્રીજનું કામ લાંબા સમયથી ચાલતું હોવા છતાં યોગ્ય સુરક્ષા વ્યવસ્થા અને ચેતવણી બોર્ડના અભાવે બાઈક સીધું ખાડામાં ઉતરી ગયું. અકસ્માતની જાણ થતાં સ્થાનિક લોકોએ તરત જ ફાયર બ્રિગેડ અને પોલીસને જાણ કરી હતી.

અમરેલી ફાયર ટીમે રાત્રિના સમયે ભારે જહેમત બાદ રેસ્ક્યુ ઓપરેશન હાથ ધરી ત્રણેયને ખાડામાંથી બહાર કાઢ્યા હતા. ત્યારબાદ 108 એમ્બ્યુલન્સ મારફતે તેમને તાત્કાલિક હોસ્પિટલ ખસેડવામાં આવ્યા હતા. જેમાં એક પુરુષનું સારવાર દરમિયાન મોત નીપજ્યું હોવાનું જાણવા મળ્યું છે, જ્યારે બે મહિલાઓની સારવાર ચાલુ છે.

આ અકસ્માત બાદ સ્થાનિક લોકોમાં ભારે રોષ જોવા મળ્યો છે. લાંબા સમયથી લીલીયા રોડ પર અંડરબ્રીજનું કામ ચાલતું હોવા છતાં ખાડા પાસે યોગ્ય લાઇટિંગ, બેરિકેડ અને સુરક્ષા વ્યવસ્થા ન હોવાના કારણે અગાઉ પણ અકસ્માતોની ભીતિ વ્યક્ત કરવામાં આવી હતી. આજે એક નિર્દોષ વ્યક્તિનો જીવ ગયો હોવાનું કહીને જવાબદાર તંત્ર સામે કડક કાર્યવાહી કરવાની માંગ ઉઠી છે.

પોલીસ દ્વારા ઘટનાની તપાસ હાથ ધરવામાં આવી છે અને અંડરબ્રીજના કામ સાથે જોડાયેલા કોન્ટ્રાક્ટર તેમજ સંબંધિત વિભાગની જવાબદારી નક્કી કરવા દિશામાં કાર્યવાહી શરૂ કરવામાં આવી છે.