🔴 બિટકોઇન અપહરણ અને ખંડણી કેસમાં મોટી રાહત

ધારી-બગસરાના પૂર્વ MLA નલિન કોટડિયાને હાઈકોર્ટ દ્વારા જામીન મંજૂર

બિટકોઇન અપહરણ અને ખંડણી કેસમાં ધારી-બગસરાના પૂર્વ ધારાસભ્ય નલિન કોટડિયાને ગુજરાત હાઈકોર્ટ તરફથી મોટી રાહત મળી છે. આજીવન કેદની સજા સામે તેમની અપીલ હાઈકોર્ટમાં પેન્ડિંગ હોય તે દરમિયાન કોર્ટે તેમને જામીન પર મુક્ત કરવાની મંજૂરી આપી છે.

પ્રાપ્ત વિગતો મુજબ, ગુજરાત હાઈકોર્ટે નલિન કોટડિયાને રૂ. 50 હજારના બોન્ડ પર જામીન આપવાનો આદેશ કર્યો છે. અગાઉ ટ્રાયલ કોર્ટ દ્વારા તેમને આજીવન કેદની સજા સંભળાવવામાં આવી હતી, જેને પડકારતા કોટડિયાએ હાઈકોર્ટમાં અપીલ દાખલ કરી હતી.

હાઈકોર્ટએ અપીલની સુનાવણી પૂર્ણ થાય ત્યાં સુધી આરોપીને જામીન પર મુક્ત રાખવાનો નિર્ણય લીધો છે. આ નિર્ણયને લઈને રાજકીય વર્તુળોમાં ચર્ચા તેજ બની છે, કારણ કે આ કેસ રાજ્યના સૌથી ચર્ચાસ્પદ બિટકોઇન ખંડણી કેસોમાંનો એક રહ્યો છે.

ઉલ્લેખનીય છે કે બિટકોઇન અપહરણ અને ખંડણી મામલે પૂર્વ MLA નલિન કોટડિયા સામે ગંભીર આરોપો હતા અને આ કેસે રાજ્યભરમાં ભારે ચકચાર મચાવી હતી. હવે હાઈકોર્ટના આદેશ બાદ કોટડિયાને તાત્કાલિક રાહત મળી છે, જો કે કેસની અંતિમ સુનાવણી હજુ બાકી છે.

કાયદાકીય જાણકારોનું કહેવું છે કે અપીલનો અંતિમ ચુકાદો આવે ત્યાં સુધી જામીન પર મુક્તિ આપવી એ કોર્ટની નિયમિત કાનૂની પ્રક્રિયાનો ભાગ છે.