🔴 અમરેલી શહેર કોંગ્રેસ સમિતિનું આવેદનપત્ર

SIRની કામગીરીમાં ગેરરીતિના આરોપ: ફોર્મ નં. 7 દ્વારા કોંગ્રેસ સમર્થક મતદારોના નામ કમી કરવાનો કાવતરાનો આક્ષેપ

પ્રેસનોટ | તારીખ: 30-01-2026 | સ્થળ: અમરેલી

અમરેલી શહેર કોંગ્રેસ સમિતિ દ્વારા આજે પ્રાંત અધિકારી શ્રી, અમરેલીને આવેદનપત્ર પાઠવી **SIR (મતદાર યાદી સુધારણા પ્રક્રિયા)**ની કામગીરીમાં મોટા પ્રમાણમાં ગેરરીતિ થતી હોવાના ગંભીર આક્ષેપ કરવામાં આવ્યા છે.

કોંગ્રેસના આગેવાનોને સ્થાનિક લોકો દ્વારા રજૂઆત કરવામાં આવી હતી કે, ઘણા મતદારો સ્થાનિક વિસ્તારમાં રહેતા હોવા છતાં અને જીવંત હોવા છતાં, તેમના નામ મતદાર યાદીમાંથી કાઢી નાખવાના પ્રયાસ થઈ રહ્યા છે. કોંગ્રેસ સમિતિનો આરોપ છે કે ભાજપ કાર્યાલયમાંથી ભાજપના કાર્યકર્તાઓ દ્વારા બુથ દીઠ ફોર્મ નંબર 7 ખોટી રીતે ભરવામાં આવી રહ્યું છે, ખાસ કરીને કોંગ્રેસ વિચારધારા સાથે જોડાયેલા મતદારોના નામ કમી કરવાનું કાવતરું ચાલી રહ્યું છે.

આ બાબત ધ્યાનમાં આવતા અમરેલી શહેર કોંગ્રેસ સમિતિએ પ્રાંત અધિકારીને આવેદનપત્ર પાઠવી ખોટી રીતે નામો રદ ન કરવામાં આવે તેવી માંગ કરી છે.

કોંગ્રેસ સમિતિએ વધુમાં જણાવ્યું છે કે, જે વ્યક્તિઓ દ્વારા ફોર્મ નં. 7 ભરી મતદારો અંગે વાંધો રજૂ કરવામાં આવ્યો છે, તેઓએ લોક પ્રતિનિધિત્વ અધિનિયમ/નિયમ 1950ની કલમ 31 મુજબ જો જાણી જોઈને ખોટી માહિતી આપી હોય અથવા ખોટો વાંધો ઉઠાવ્યો હોય તો તે કાયદાકીય ગુનો બને છે. તેથી આવા વાંધા રજૂ કરનાર વ્યક્તિઓ સામે તપાસ કરી, જો ગેરરીતિ સાબિત થાય તો કાયદેસરની કાર્યવાહી કરવા કોંગ્રેસે માંગ કરી છે.

આ આવેદનપત્ર પાઠવતી વખતે અમરેલી શહેર કોંગ્રેસ સમિતિના પ્રમુખ શ્રી સંદીપભાઈ ધાનાણી સહિત ટીકુભાઈ વરુ, મનીષભાઈ ભંડેરી, સંદીપભાઈ પંડ્યા, સમીરભાઈ કુરેશી, બી.કે. સોળિયા, પ્રહલાદભાઈ સોલંકી, ડી.ડી. પરમાર, ઘનશ્યામભાઈ થળેશા, રાજુભાઈ ઠાકોર, રાવજીભાઈ મકવાણા, ભાવિનભાઈ ગોસાઈ, રોનકભાઈ ધાનાણી, મીતેશભાઈ ઠુમ્મર સહિતના આગેવાનો હાજર રહ્યા હતા.

કોંગ્રેસ સમિતિએ સ્પષ્ટ કહ્યું છે કે, જો મતદારોના નામ ખોટી રીતે કમી કરવાની કાર્યવાહી બંધ નહીં થાય તો તેઓ આગળ વધુ કડક પગલાં લેવા પણ મજબૂર બનશે.