🔴 બ્રેકીંગ: અમરેલી જિલ્લામાં સાયબર ફ્રોડની ફરીયાદો વધુ નોંધવા SPનો આદેશ

14 લાખથી વધુની ઓનલાઈન ઠગાઈ, APK-‘RTO’ ફાઈલથી છેતરપિંડીના કેસો સામે આવ્યા

અમરેલી જિલ્લામાં વધતા જતા સાયબર ફ્રોડ અને ઓનલાઈન છેતરપિંડીના બનાવોને લઈને જિલ્લા પોલીસ વડા એસપી સંજય ખરાતે તમામ પોલીસ સ્ટેશનના થાણા અધિકારીઓને મહત્વનો આદેશ આપ્યો છે. એસપી દ્વારા સૂચના આપવામાં આવી છે કે સાયબર ફ્રોડના વધુમાં વધુ ગુન્હા નોંધવામાં આવે અને તટસ્થ રીતે તપાસ કરવામાં આવે, જેથી પીડિતોને ઝડપી ન્યાય મળી શકે અને ઠગાઈ કરનારાઓ સુધી પોલીસ પહોંચી શકે.

પ્રાપ્ત માહિતી મુજબ, જિલ્લામાં સાયબર ફ્રોડની અલગ અલગ પોલીસ સ્ટેશનોમાં કુલ 7 ફરીયાદો નોંધાઈ છે. આ ફરીયાદો અમરેલી, સાવરકુંડલા, રાજુલા, જાફરાબાદ, બાબરા, ખાંભા સહિતના વિસ્તારોમાં નોંધાઈ હોવાનું સામે આવ્યું છે.

APK અને ‘RTO’ ફાઈલથી કરાતી ઠગાઈ

પોલીસ તપાસમાં ખુલ્યું છે કે ઠગો દ્વારા લોકોને APK અથવા ‘RTO’ નામની ફાઈલ મોકલવામાં આવે છે, જેને ડાઉનલોડ કરાવતા મોબાઈલમાં શંકાસ્પદ એપ ઇન્સ્ટોલ થઈ જાય છે. ત્યારબાદ અલગ અલગ રાજ્યના ઠગો દ્વારા ઓનલાઈન એકાઉન્ટમાંથી રૂપિયા ઉપાડી લેવાય છે.

આ પ્રકારની છેતરપિંડીમાં અત્યાર સુધી કુલ 14 લાખ રૂપિયાથી વધુ રકમ ઓનલાઈન ઉપાડી લેવાઈ હોવાની વિગતો સામે આવી છે, જેના આધારે પોલીસ દ્વારા ગુન્હા નોંધવામાં આવ્યા છે.

જનજાગૃતિ માટે પોલીસની તજવીજ

એસપી સંજય ખરાતના આદેશ બાદ જિલ્લામાં સાયબર ક્રાઇમ અંગે લોકોમાં જનજાગૃતિ લાવવા તેમજ આવા ગુન્હાઓને ગંભીરતાથી લઈ વધુ કેસ નોંધવાની કાર્યવાહી હાથ ધરવામાં આવી છે. પોલીસ દ્વારા લોકોને પણ અપીલ કરવામાં આવી છે કે અજાણી લિંક, ફાઈલ અથવા એપ ડાઉનલોડ કરતા પહેલા સાવચેત રહે.

➡️ પોલીસનું કહેવું છે કે કોઈપણ શંકાસ્પદ કોલ/મેસેજ/લિંક મળે તો તરત નજીકના પોલીસ સ્ટેશન અથવા સાયબર ક્રાઇમ હેલ્પલાઇનમાં ફરિયાદ કરવી.